Vəliş Zirvəli

Qara günlərin şahidi ağ saçlı Giya

Yaxşı yadımdadır, «Elimiz. Günümüz» qəzetində Qiymət Məhərrəmlinin Giya Paçxataşvili ilə müsahibəsini oxumuşdum. Giya o Giyadır ki, dünyanın min bir məhrumiyyətlərini görüb, min bir ağrısını yaşayıb. Qayğıdan, nəvazişdən, sevgidən, kökdən, bünövrədən uzaq Giya.

O müsahibəni oxuyandan sonra qəlbimdə Giya Paçxataşvilini görmək arzusu artdı. Məhəmməd Köçkünlə bir gün Giyanın qonağı olduq. Görüşdük qara günlərin şahidi ağ saçlı Giya ilə.

İlk görüşdən insana daha yaxın, daha doğma olan, həlim xasiyyətli, mehriban ünsiyyətli bir insanın söhbətlərindən doymaq olmurdu. Sözarası yeganə sirdaşı, həyat yoldaşı Lamara xanımın Tiflisdə ağır əməliyyatından danışdı. Biz də öz növbəmizdə Lamara xanıma Allahdan şəfa dilədik. Dünyanın bir çox əzab-əziyyətlərindən keçmiş bir insanın bu qədər saf, səmimi olduğuna inana bilmirdim.

Xeyli söhbət etdik. Söhbət əsnasında yaralı yerimiz olan Qarabağı qarış-qarış gəzdiyini, şair Ağa Laçınlı və yazıçı Aqil Abbasla Laçına getdiyini dedi. Saf qəlbli, doğma ünsiyyətli bu insanın söhbəti o qədər şirin oldu ki, vaxtın necə keçdiyini bilmədik.

Ayrıldıq. Sənə uzun ömür, cansağlığı, Lamara xanıma isə Ulu Yaradandan şəfa diləyirik, əzizim Giya!

ADAMI

Giya Paçxataşvili

Heç bilmədin ağ gün nədi,

Ey dünyanın ağ adamı.

Dərdə nə var girsə cana,

Əridər lap dağ adamı.

Hanı xoş günlərin, hanı?

Barmaqla sayılar sanı.

Dərd gəlsə qurudar canı,

Xəstə salar sağ adamı.

Qəmdən bağrın dəlik-dəlik,

Azalmır, artır üstəlik.

Hardan tapdı bu xəstəlik

Dərdinə ortaq adamı?

Dərd var qovsan iki əlli,

Gələr, işi olmaz bəlli.

Verən olsa bir təsəlli,

Saxlayar toxdaq adamı.

Dərd var artıq gilə-gilə,

Həlli dönür bir müşkülə.

Dərd var gəlir gülə-gülə,

Gözləyir sınaq adamı.

Yaxşıları yamandan seç,

Hər sınaqdan üzüağ keç.

Əyilmədin, əyilmə heç,

Döz dövrün qoçaq adamı.

P.S. Yazı çapa gedərkən bir acı xəbər döydü qapımızı. Eşitdik ki, Giyanın ömür-gün yoldaşı, sirdaşı Lamara xanım dünyasını dəyişib. Allah rəhmət eləsin, qəbri nurla dolsun! Ulu Yaradan onsuz da səbirli olan Giyaya bir daha səbir versin!