BU BAHAR

Qayğı dumanları tutub hər yanı,

Quşlar lal olub da vermir səs - səsə.

Üşütmə tutubdur Azərbaycanı -

Bu bahar bənzəmir bahara nəysə.

Göydə sıralanıb qız - gəlin ahı,

Siyasət savaşla girişib bəhsə.

Məzar tünlüyündən inlər torpağım -

Bu bahar bənzəmir bahara nəysə.

Oğullar qırılır, çəkilir ruzu,

Toy-məclis xoş gəlmir bu yaz heç kəsə.

Utana-utana gəlir Novruzum -

Bu bahar bənzəmir bahara nəysə.

Bahalıq, hərc - mərclik şeytansayağı

Can atır... elimin səbrini kəsə.

Qərənfil üzgündür, lalələr fağır -

Bu bahar bənzəmir bahara nəysə.

Qələm qan ağlayır, vərəq saralır,

Şairin ilhamı gəlmir həvəsə.

Ümid də sonrakı bahara qalır -

Bu bahar bənzəmir bahara nəysə.

Qələbə-xalqımın sınmaz inamı...

Cəbhədən müjdəli bir xəbər gəlsə:

Üşütməz bu soyuq bahar adamı -

Bu bahar bənzəmir bahara nəysə.

Ey əsgər! Şad eylə könül evimi,

Azadlıq -  möhtacam mən bu mərəzə.

Qoy gülsün bir kərə üzü Givinin...

Bu bahar bənzəsin hər gələn yaza.

Giya Paçxataşvili - 29.03.1993