GƏLMİŞƏM...

Bahara vurulmuşum,                                                                                                    Dərdlərdən qurtulmuşum.

Həyatdan yorulmuşum,

Gəlmişəm...

Ürəyimə köçənim, 

Məni qəmlə ölçənim,

Dar mənzili seçənim,
Gəlmişəm...

Bu məzar, bu da mənəm,
Dağlardan enən çənəm.

Tir-tir əsən bədənəm,

Gəlmişəm...

                        08.03.2015.

TƏZƏ QƏBİR

Təzəcə salınan qəbir,

Qəlbimə çalınan qəbir,

Hasara alınan qəbir,

Açılıb da məni götür,

Tezcə öz yarıma yetir.

Gecikib eləmə, qəbir,

Yönəltmə ələmə, qəbir,

Söylərəm aləmə, qəbir...

Açılıb da məni götür,

Tezcə öz yarıma yetir.

Bağlanır ömür kitabım,

Nə səbrim qalıb, nə tabım.

Özümü harada tapım?..

Açılıb da məni götür,

Tezcə öz yarıma yetir.

Rəhmin gəlsin mənə, qəbir,

Salma sisə, çənə, qəbir,

İmana gəlsənə, qəbir...

Açılıb Giyanı götür,

Tezcə Lamaraya yetir.

11.05.2014.